Kári Stefánsson, forstjóri Íslenskrar erfðagreiningar, heldur fyrstur hátíðarfyrirlestur í fyrirlestraröð rektors Háskóla Íslands á aldarafmæli skólans. Starfsfólk Íslenskrar erfðagreiningar hefur lagt mikið til þekkingar á sviði mannerfðafræði og heldur uppi samstarfi við 150 háskóla á heimsvísu. Fyrirlestur Kára, Hönnun manns - hvernig maðurinn skapast af samspili erfða og umhverfis, verður fluttur í Hátíðasal Aðalbyggingar Háskóla Íslands 15. janúar næstkomandi.

„Í erindinu mun ég leitast við að setja í samhengi það sem vitað er um þær upplýsingar sem þarf, til þess að búa til mann. Allt lífríki jarðar á rætur sínar í upplýsingum sem skráðar eru í tiltölulega einfaldan kóða, niðurröðun níturbasanna A, C, G og T. Allur fjölbreytileiki lífríkisins á rætur sínar í fjölbreytileika sem liggur í þessum einfalda kóða. Munurinn á manneskjum liggur í upplýsingum kóðans. Mjög fátt í eðli mannsins á ekki rætur í upplýsingum sem voru fluttar frá foreldrum okkar í gegnum DNA.“ Þess vegna segir Kári að eina val mannfólksins sem skipti raunverulegu máli sé „val“ þess á foreldrum en því vali fær raunar enginn stjórnað.

Breytileiki sem hefur áhrif á háskólanám

Starfslið Íslenskrar erfðagreiningar hefur á síðustu árum fundið út hvernig mismunandi röðun níturbasa í erfðamengjum veldur breytilegum eiginleikum hjá fólki. Dæmi um slíka eiginleika eru hárlitur manna og hvernig fólk stafsetur.

„Nýlega fundum við sérstaka röðun níturbasa sem hefur áhrif á það hvort einstaklingur fer í háskóla. Við könnuðum 1.500 manns með háskólapróf og 15.000 sem voru ekki með háskólapróf og fundum sérstaka röðun níturbasa í meira mæli hjá þeim sem fóru í háskóla en hjá hinum sem gerðu það ekki. Það er varla nokkuð í lífi okkar sem ekki er undir áhrifum erfðamengja. Að því leyti erum við ekki öðruvísi en skordýr. Það er ekkert dulrænt við það hvernig við erum.“