- Saliu ishte portë e shtyllë, a thua nji shkamb në të cilin tash 10 vjet i turren tallaze të mëdha pa mujte me e bremun kërkund. Gjergj Fishta.

- Saliu ishte intelektuali më i aftë dhe më konsenguent i kohës'. Luigj Gurakuqi

- Saliu kur fliste për çështjen Kombëtare dridhej i tëri si purtekë'. Skënder Petro Luarasi

- Ai hyll që perëndoi ishte personifikim i ç'quem i delikatesës dhe i pastërtisë së gjuhës sonë kombëtare. Këtë humbje nuk do ta verë në vend as një e katërta e shekullit. Kadri Prishtina

- S'të keshëm rradhë si çdo rradhë por shok me Ismail Qemal. Këngë e ngritur nga populli

Sali Nivica lindi më 15 maj 1890 në Rexhin të Kurveleshit të Sipërm rrethi Tepelenë, u vra nga armiqtë e Shqipërisë më 10 janar 1920 në Shkodër.

Edukimi

Në vitin 1904 filloi studimet e shkollës së mesme në gjimnazin 'Idadi Mylyqi' të Manastirit. Aty u lidh me atdhetarin Bajo Topulli, themelues i 'Komitetit të Parë Kryengritës për çlirimin e Shqipërisë, aktivist i të cilit u bë edhe djaloshi Sali Nivica, sidomos me shkrime me frymë të fuqishme atdhetare në shtypin e kohës. Dy vitet e fundit të shkollës së mesme Saliu i perfundoi, në vitin 1909, në gjimnazin Zosimea të Janinës.

Aktiviteti arsimor, patriotik dhe politik

Aty ai vijoi të merret me veprimtari atdhetare, bëhet antar i klubit 'Shoqria shqiptare' dhe shkruan në shtypin e kohës. Është redaktor i vetëm i gazetës 'Zgjimi' dhe bashkepunon shpesh me gazetën 'Liria'. ë Janinë, bëhet mësues para kohe duke mbledhur nxënës të klasave më të ulta të Idadijes së Janinës dhe u mësonte atyre gjuhën shqipe. Gazeta 'Liria', pas mbarimit të shkollës, shkruante se Sali Nivica ishte një nga më të zgjuarit e të palodhurit nga të diplomuarit e shkollës së Janinës. Në prag të shpalljes së Pavarsisë, Saliu, për karakterin e vlerat e tij atdhetare e publicistike, u zgjodh nga Luigj Gurakuqi që t'a shoqëronte atë gjatë vizitave në disa kryeqytete të Evropes. Ishte pjesëmarrës në grupin që përgatiste kryengritjen antiosmane në shkallë kombëtare. Komiteti Organizator e cakton Sali Nivicën dhe Nikoll Kaçorrin të merret me përgatitjen e koordinimin e kryengritjes në Shqipërinë e Jugut. Duke u nisur nga Durrësi, ku Nikolla ishte i dënuar me arrest shtëpie e nuk mund të lëvizte, Saliu shkon i vetëm në Vlorë, Sarandë, Delvinë, Gjirokastër, Kurvelesh, Tepelenë, Berat dhe merr takim me parinë e krahinave dhe njerzit atdhetar për t'u organizuar. Mori pjesë direkte në organizimin e kryengritjes së parë antiosmane në Kurvelesh e me pas në Manastirin e Cepos në korrik 1911, ku morën pjesë paria dhe mbi 800 burra të armatosur që nga Çamëria, Delvina, Saranda, Gjirokastra, Përmeti, Tepelena, Vlora etj. Në korrik 1912, i gjendur në Durrës si mësues, për veprimtaritë e tij antiosmane, arrestohet dhe burgoset në Stamboll. Pasi u lirua nga burgu me ndërhyrjen e Ismail Qemalit, fillon punën e mësuesit të gjuhës shqipe në 'Rober Kolezh', në Stamboll, ku krijon edhe drejton shoqërinë Qarku letrar. Në vitet 1914-1915 bashkëpunoi me publicistin e atdhetarin Muço Qulli për nxjerrjen e gazetës Populli, dhe deri me 1916 punoi në fushen e arsimit. Ishte mbrojtes e përhapës i flaket i arsimit dhe gjuhës shqipe. Motua e tij ishte Kombin e mban dhe difton komb nji atdhe homogjen, nji histori e kthjellët, nji besim i bashkët e nji gjuhë e livrueme. Ai kërkonte të ngrihej një Akademi për studimin e një gjuhe të përbashkët dhe një fjalor të gjuhës shqipe. Më pas veprimtaria shkencore, politike dhe atdhetare e Sali Nivicës përqëndrohet në Shkodër. Më 6 shkurt 1918 ftohet dhe bëhet anëtar i "Komisisë letrare", të krijuar në Shkodër më 1916, ku dha një kontribut të veçantë për probleme të lëvrimit të gjuhës shqipe ilegale në Shkodër, asaj Vllaznia e Rozafa. Është ndër organizatorët e krijimit dhe zgjidhet anëtar i Komitetit 'Mbrojtja Kombëtare e Kosovës' dhe anëtar i kryesisë së tij, prej 7 anëtarësh (7 nëntor 1918). Aty bashkëpunoi me figura të ndritura kombëtare si Kadi Hoxha, Hasan Prishtina, Bajram Curri, Kel Marubi, Sotir Peçi, Elez Isuf Ndreu, Gjergj Fishta, Ndre Mjeda, Vinçens Prenushi, Sejfi Vllamasi etj. Si anëtar i Kryesisë, ai vuri në dispozicion të Komitetit Mbrojtja Kombëtare e Kosovës gazetën e tij Populli, zyra e të ciles u zhvendos në oborrin e ndërtesës së Komitetit. Nga numri i parë e deri te ai nr.19 gazeta doli me moton 'Për lavdinë e Atdheut' dhe, gjatë punimeve të 'Konferencës së Paqes në Paris', deri te numri i fundit, numri 48 (10 janar 1920) duke ju përgjigjur zhvillimeve brenda dhe jashtë vendit e për mbrojtjen e tërësisë së territoreve shqiptare, doli nën moton 'Për indipendencën e plotë të Shqipërisë'. Gazeta Populli botohej kryesisht në dialektin gegërisht por që lexuesi do të lexoje edhe dialektin toskërisht. Ajo nën drejtimin e Sali Nivicës duke qëndruar në pararojë të mendimit atdhetar të kohës, u bë shprehëse e programit politik të Komitetit dhe e interesave mbarë kombëtare, sipas të cilit 'Duhet me i dalë zot vetsundimit e tanesisë toksore të Shqipnisë, me përdor çdo mjet me çlirue Kosovën dhe Dibrën, e çdo vend ku flitet shqip e me u bashkue nën sundim të Shqipërisë së lirë'. Ai i dha gazetës, sidomos në vitin 1919, duke e shpërndarë atë jo vetem brenda Shqipërisë, por edhe jashtë shtetit , në Francë, Itali, Zvicër dhe SHBA, karakter të theksuar kombetar e atdhetar, në mbrojtje të pavarsisë e të tërësisë territoriale të shtetit të ri shqiptar, që u shprehen hapur edhe në 'Konferencën e Paqes në Paris', në vitet 1919-1920. Veprimtaria e tij atdhetare e publike ishte pengesë për planet aneksioniste serbo-sllave, italiane e greke. Ndaj më 10 janar 1920, në prag të ngjarjes së madhe kombëtare, të mbledhjes së Kongresit të Lushnjës, u vra në Shkodër nga Kolë Ashiku, njeri i vënë në shërbim të forcave pushtuese serbe e italiane, i paguar dhe i armatosur posaçërisht. Shkodra, ditën e varrosjes, i bëri Saliut të gjitha nderimet e rastit, duke e shpallur ditë zie.

Tituj e dekorata të larta Shtetërore për veprimtarinë e tij

Sali Nivica merr titullin e lartë Mësues i Popullit më mars të 1961, gjithashtu më vitin 1971 me vendim të Komitetit ekzekutiv të Këshillit Popullor të rrethit Tepelenë i'u dha titulli 'Dëshmor i vjetër i Atdheut'. Sali Nivicës i'u dha nga Presidenti i Republikës së Shqipërisë zoti Bamir Topi me vendim Nr.6849 dt.17.01.2011 Urdhri Nderi i Kombit dekorata më e lartë e Republikës.

Burimet

^ 1.Muzeu Historik Tepelenë
^ 2.Bilbioteka Kombëtare Tiranë
^ 3.Biblioteka e qytetit Shkodër
^ 4.Gazeta Populli (Arkiva e Shtetit Shqipëtar)
^ 5.Një jetë për Kombin -Prof.Dr. Gazmend Shpuza e Fatmir Çela

Loading more stuff…

Hmm…it looks like things are taking a while to load. Try again?

Loading videos…