as candongas do quirombo

As Candongas do Quirombo somos un colectivo poético audiovisual formado orixinalmente pola poeta Andrea Nunes Brións e a comunicadora audiovisual Raquel Rei Branco.
Cunha perspectiva feminista e cooperativa, o colectivo está aberto a multitude de mulleres diversas sen límites xeográficos nin lingüísticos, que coa súa participación contribúan, ben sexa en momentos puntuais como ao longo do tempo, a aumentar a nosa produción audiovisual e poética. Así, As Candongas do Quirombo está composto por mulleres que traballan para ensinar o mundo de forma crítica, creativa e feminista.
As temáticas dos nosos traballos son múltiples, porque como persoas preocupámonos e implicámonos en diversas cuestións que van desde a situación da muller até as problemáticas lingüísticas na Galiza, pasando pola ecoloxía, a educación ou o respecto polas culturas. Non nos poñemos límites nas temáticas porque non queremos límites nas nosas vidas.
As Candongas do Quirombo é un colectivo plural, feminista, creativo, preocupado, innovador, comprometido e autoxestionado.