Oppdrag Mottro

I mange år har Linda Eide ringt mor si. Aldri for å spørja korleis det står til. Alltid for å grava fram noko gammalt som er nytt. For det mora fortel frå Linda sin barndom liknar ikkje på den barndommen Linda sjølv hugsar. Og når mora fortel frå si tid, også kalla gamle dagar, er det frå eit liv Linda aldri var ein del av. Byrja ikkje Mottro sitt liv med at Linda blei fødd?

Du kan gle deg til ei vittig og tankevekkande utforsking av korleis gamle dagar lever vidare i notida. Linda lengtar tilbake til ei tid som aldri kjem att. Mora står trygt planta i notid og ser seg ikkje tilbake. LINDA: Fekk du ikkje leva ut personlegdomen din, er det det du seier? MOTTRO: Men herlegheit, det fanst jo ikkje personlegdom før, og om han fanst så hadde ein jo ikkje råd til å bry seg om han, og i alle fall ikkje leva han ut.

Endeleg kan publikum få gleda av å oppleva Linda Eide i ei varm soloframsyning der ho forsøker å få has på desse mystiske gamle dagane. Ho som spør og grev , trur det let seg gjera. Ho som svarar kunne ikkje brydd seg mindre.

OPPDRAG MOTTRO

Av og med Linda Eide

Regi : Arvid Ones

Scenografi: Olav Myrtvedt

Stemma til Mottro: Liv Bernhoft Osa

Lys: Einar Bjarkø

Video: Einar Bjarkø, Linda Eide

Video/ Lyd tilrettelegging: Mathias Grønsdal

Promovideo/ Klipp: Andreas Roksvåg

Musikk : The Acoustic Troubadours: Always on My Mind (Instrumental)

Produsert av Hordaland Teater i samarbeid med HiHat.