Mirko Baselgia è il giast en l'emissiun "Discurs". Ils 21 da mars 2013 è vegnida inaugurada ina nova exposiziun en il Museum d'art grischun: PRIMAVERA - l'emprima exposiziun individuala da Mirko Baselgia. Per l’avertura da sia exposiziun discurra il giuven artist grischun cun Rico Valär davart sias inspiraziuns, sias lavurs artisticas e ses projects insolits cun avieuls, cun in luf e cun lava giu dal Vesuv.
Mirko Baselgia è oriund da Lantsch. Suenter in giarsunadi sco dissegnader da construcziun auta, ha el studegià art figurativ a Turitg. Per sia ovra artistica ha el survegnì l’onn passà dus impurtants premis, in premi d’art da la Fundaziun Kiefer Hablitzel ed il premi d’art per il Grischun dal Manor.
